Green Grow The Rashes, O

Robert Burns

Chorus:
Green grow the rashes, O
Green grow the rashes, O
The sweetest hours that e'er I spent
Are spent amang the lasses, O.

There's naught but care on ev'ry han'
In ev'ry hour that passes, O
What signifies the life o' man,
An' 'twere not for the lasses, O!

Chorus

The warldly race may riches chase
An' riches still may fly them, O
An' though at last they catch them fast,
Their hearts can ne'er enjoy them, O!

Chorus

Gie me a cannie hour at e'en
My arms around my dearie, O,
An' warldly cares, an' warldly men
May a' gae tapsalteerie, O!

Chorus

An' you sae douce, wha sneer at this
Ye're naught but senseless asses, O!
The wisest man the world e'er saw,
He dearly lo'ed the lasses, O!

Chorus

Auld nature swears the lovely dears,
Her noblest wark she classes, O
Her 'prentice han' she tried on man
And then she made the lasses, O.

Chorus